3 araw na ultimatum ng Maynila sa ICTSI

MANILA, Philippines - Tatlong araw lamang ang ibinigay ni City Building Official chief, Engr. Mel­vin Balagot sa International Container Terminal Service, Inc. (ICTSI) at sa Hanjin Corporation upang isumite ang kanilang mga hawak na permit para sa konstruksiyon ng pantalan sa Isla Puting Bato sa Tondo, Manila.

Sa panayam kay Bala­got, kailangan na matiyak na may hawak na permit ang ICTSI at ang Hanjin bago nagsagawa ng anu­mang konstruksiyon sa lupa na sakop ng   lungsod ng Maynila.

Ayon kay Balagot, pa­ngu­nahing tungkulin ng city government na tiyakin ang seguridad ng lugar lalo pa’t napapaligiran ito ng mga squatters.

Nabatid na hanggang sa Martes maaaring isu­mite ng ICTSI ang mga doku­mento matapos na bigyan nila ito ng notice noong Biyernes.

Sakali umanong ma­bigo ang ICTSI na mag­sumite ng permit, mapipili­tan umano siyang mag- isyu ng Cease and Desist Order.

Sinabi ni Balagot na tila binalewala ng dalawang kom­panya ang building code na isang panguna­hing dapat na batayan sa pagpapatayo ng anumang gusali o konstruksiyon. Lumabag umano ang ICTSI sa 301 ng National Building Code.

Samantala, tiniyak din ni Manila Vice Mayor Isko Moreno na hindi nila lulu­ba­yan ang isyu hangga’t walang linaw kung sino ang dapat na managot sa gina­gawang pantalan.

Aniya, hindi maaaring balewalain na lamang ng konseho at ng city government ang umano’y pam­ba­­bastos ng ICTSI dahil maging ang ibang mga   kompanya ay sumusunod sa batas.

Lumilitaw na maging US Embassy at ang Central Bank ay nagbabayad ng mga fees sa city go­vern­ment.