2 pang fetus natagpuan sa Maynila

MANILA, Philippines - Dalawang sanggol na naman ang hindi binigyan ng pagkakataon ng kani-kanilang mga ina na maisilang sa mundo.

Batay sa ulat ng Manila Police District (MPD)-Homicide Section, ang mga fetus, na pinaniniwalaang itinapon mismo ng kanilang mga ina, ay natagpuang inabandona sa magka­hiwalay na lugar sa Maynila nitong Huwebes.

Unang natagpuan dakong alas-12:30 ng hapon ang isang babaeng fetus, na nasa pito hanggang walong buwang gulang na, sa isang trash can sa Luneta Park sa Ermita, Manila.

Isang di pinangalanang security guard, na kasalukuyang nag-i-inspeksiyon sa lugar, ang nakadiskubre sa fetus na itinapon sa isang trash can, kaya’t ini-report ito sa pulisya.

Samantala, dakong alas-6:00 naman ng gabi nang matagpuan ng mga naglalarong bata ang isa pang fetus, malapit sa dagat, sa Purok 5 Dulo Isla Puting Bato sa Tondo.

Tinatayang nasa tatlo hanggang apat na buwan pa lamang ang fetus kaya’t hindi pa batid ang kasarian nito.

Ang dalawang fetus ay kasalukuyang naka­lagak sa St. Harold Funeral Homes para sa safekeeping ng mga ito.