Reward sa magsosoli ng cocaine bricks, daragdagan

MANILA, Philippines - Plano ng pamunuan ng Philippine Drug Enforcement Agency (PDEA) na dagdagan ang pabuya sa mga sibilyan na kusang magbabalik ng mga cocaine bricks na bahagi sa 2 toneladang drogang itinapon sa karagatan ng Samar.

Ayon sa PDEA, ang karagdagang pabuya sa sibilyan ay upang mapabilis ang pag-recover sa mga droga na hanggang sa kasalukuyan ay nasa kamay pa ng ilang mga mangingisda sa pag-aakalang makapagbibigay-ginhawa sa kanila sa sandaling maibenta.

Sa ngayon, nagbibigay ang pamunuan ng PDEA-8 ng pabuyang isang sakong bigas kapalit ang bawat cocaine brick na isasauli sa kanila o kaya’y sa Philippine National Police.

Sinabi ng pamunuan na sa sandaling magkaroon ng karag­dagang pabuya ay posibleng mapabilis ang pagsasauli sa mga droga na patuloy na itinatago ng ilang sibilyan.

Nauna nang nagbabala si PDEA Director Senior Under­secretary General Dionisio Santiago sa mga ibinebentang cocaine sa ilang lugar sa Metro Manila na galing sa Samar dahil inilalagay na rin ito sa tingi-tinging pamamaraan na bagong estilo ng mga drug pushers.

Ayon sa report na natanggap ng ahensiya, ang naka-sachet na droga ay hinahaluan na rin ng extenders kung kaya hindi na puro ang pagkakalagay nito.

Kamakailan lang ay itinurn-over sa PDEA ang may 131 na bricks ng cocaine na na-recover ng inter-agency Task Force Samar Cocaine Bricks na binubuo ng mga PDEA, PNP Regional Office 8, PNP-AIDSOTF at ang Philippine Coast Guard.