Kelot na nakipaglamay, napatay

MANILA, Philippines - Pinaglalamayan na rin ngayon ang isang lalaki na nasaksak sa naganap na rambol sa pinuntahan nitong burol ng kaibigan, kahapon ng madaling-araw sa Taguig City.           

Nagtamo ng mga saksak sa katawan ang biktimang nakilalang si Roque Bautista, oven operator ng isang pana­derya, at naninirahan sa UPHS-2, Parañaque City.           

Sa imbestigasyon ng Taguig City police, naganap ang insidente dakong alas-2 ng madaling-araw nang dumayo si Bautista sa burol ng isang kaibigan sa may Raja Sumakwil St. sa naturang lungsod.           

Nanonood umano ng mga nagsusugal ng cara y cruz ang biktima nang biglang magkagulo makaraang magtalo ang mga mananaya ukol sa dayaan. Dito sumiklab ang isang rambol. Nang maawat ang kaguluhan, nadiskubre ang naka­bulagtang biktima na tadtad na ng saksak sa kanyang katawan.

Pinaghahanap naman ngayon ng pulisya ang mga lalaking sangkot sa naturang rambol makaraang magkanya-kanyang tumakas matapos ang insidente.