Lola patay sa ligaw na bala

MANILA, Philippines - Minalas ang isang 63-anyos na lola na masawi nang tamaan ng ligaw na bala habang nagbabantay ng kanyang tindahan na pinaniniwalaang mula sa na­ganap na palitan ng putok sa pagitan ng mga pulis at dalawang lalaking armado ng baril, kamaka­lawa ng umaga, sa San Miguel, Maynila.

Kinilala ni Chief Insp. Erwin Margarejo ang bik­timang si Maisalam Taram, may-ari ng sari-sari store at resi­dente ng #648 Carlos Pa­lanca St., San Miguel.

Isinailalim naman sa im­bestigasyon ang mga ta­uhan ng Manila Poilce District-Outpost No. 7 ng Station 8, na sina SPO3 Yo­lando Espina at PO2 Jesus de Leon na sangkot sa palitan ng putok.

Nagsasagawa naman ng manhunt operation laban sa isang Alioden Tamano, residente ng  C. Palanca St., San Miguel, Maynila at isang di-nakila­lang lalaki na kasama niyang tumakas.

Ayon sa ulat, dakong alas-10 ng umaga nang maganap ang insidente sa harap ng gate ng  Rawaton compound, sa C. Palanca St., San Miguel.

Paliwanag ng dalawang pulis, nakatanggap sila ng tawag na may dalawang lalaki umano na may da­lang baril sa nasabing kalye kaya’t pinuntahan nila ito.

Nang nasa lugar na sila ay sinalubong na umano sila ng mga putok ng dala­wang lalaki dahilan upang gantihan nila ito ng putok.

Nang makatakas na ang dalawa ay nakita nila ang nakahandusay na matanda na duguan at may tama ng bala sa dibdib.

Isinugod ang biktima sa Mary Chiles Hospital su­balit kinagabihan ay bina­wian din ng buhay.

Ayon kay Margarejo, nagsumite na ng kanilang mga service firearms sina De Leon at  Espina para sa ballistic examination upang matukoy kung nagmula sa kanila ang bala na na­ka­­patay sa lola. (With trainees­ Marlon Epiz at Pamela Galindez)