Bangayan sa MMDA lumalala

MANILA, Philippines - Lumalala na ngayon ang nagaganap na bangayan sa pagitan ng mga matataas na opis­yales ng Metropolitan Manila Development Authority (MMDA) dahil sa labanan sa kapangyarihan habang hindi pa nagtatalaga ng bagong “ap­point­ment” si Pangulong Be­nigno Aquino III.             

Dahil dito, hiniling na ni MMDA Chairman Oscar Ino­centes kay P-Noy na mag­talaga na ng bagong uupong chairman ng ahensya kung hindi siya ang napipisil nito upang matigil na ang gusot sa ahensya at maisa­ayos na muli ang operasyon nito.

Nauna nang inakusahan ni Inocentes sina MMDA Ge­neral Manager Robert Na­cian­ceno at Traffic Operations Director Angelito Vergel De Dios na sina­sabotahe umano ang araw-araw na operasyon ng ahensya dahil sa hindi siya kinikilala na siya pa ring pinuno nito.             

Iniipit umano ang mga papeles na kanyang pipirma­han sanhi ng pagkakaantala ng sahod at allowances ng may 8,000 kawani ng MMDA. Isinisi rin nito kay De Dios ang na­ganap na pagsisikip sa daloy ng trapiko na sinuong ni Pangulong Aquino sa pagdalo nito sa “turn-over ceremony” sa Armed Forces of the Philip­pines (AFP) kamakailan kung saan nagpa­tawag umano ito ng miting sa mga traffic enforcers na hindi alam ni Inocentes kaya walang nag­mando ng trapiko sa EDSA.             

Sinabi ni Inocentes nag-aapura si Nacianceno na umalis na siya sa puwesto ma­tapos na isumite ang kan­yang kahilingan kay Pangu­long Aquino na iupo na siya bilang officer-in-charge ng ahensiya. 

Nilinaw ni Inocentes na kung sakali at alisin siya sa puwesto ni Pangulong Aqui­no, hindi naman si Nacian­ceno ang dapat na maupo bilang OIC dahil mayroon siyang vice chairman sa katauhan ni Cesar Lacuna.