Nagsampay sa kable ng kuryente, natusta

MANILA, Philippines - Patay ang isang 22-anyos na obrero maka­raang makuryente nang isampay nito ang kan­yang bagong labang damit sa kable ng kuryente, kamakalawa ng hapon sa Pasig City.            

Nakilala ang nasawi na si John Henry Cotoner, stay-in sa Oasis Construction Site sa Marcos Highway, Brgy. Santolan, ng naturang lungsod at naninirahan sa Bagong Silang, Caloocan City.

Isinugod naman sa Sta. Maria Hospital sa Marikina City ang dalawang kasamahan nito sa trabaho na sina Errol Serona, 21 at Robert Cortez, 22, makaraang madamay sa pagkakuryente nang tangkaing iligtas si Cotoner.             

Sa imbestigasyon ng Pasig police, naganap ang insidente dakong alas-5:30 ng hapon sa cons­truction site. 

Nabatid na naligo ang biktima at nilabhan ang suot nitong damit na isinampay sa nakalaylay na kawad ng kuryente.             

Lingid naman sa kaalaman ni Cotoner, may bahagi ng kawad ang talop kaya mabilis na dumaloy ang kuryente na mas lalo pang lumakas dahil sa basa ang damit at ang katawan ng biktima sanhi upang magkikisay ito.              

Tinangka namang saklolohan nina Serona at Cortez ang kasamahan ngunit maging sila ay nakuryente rin nang mapalapit sa basang bahagi ng pinaglalabahan ni Cotoner.