Mataas na singil sa SLEX, tuloy na bukas

MANILA, Philippines - Tuluy-tuloy na ang 250 por­syentong pagtataas sa singil sa toll sa South Luzon Express­way (SLEX) bukas (Hulyo 7) hang­­gang hindi nakakatang­ gap ng kautusan para ipagpa­liban ito.             

Sinabi ni Toll Regulatory Board (TRB) spokesman Julius Corpuz na wala pa silang nata­tanggap na kautusan para ipag­paliban ito buhat sa ba­gong upong administrasyong Aquino. 

Wala na umanong atrasan ito dahil sa una na nilang ipi­nagpaliban ang dati nilang iskedyul na Hunyo 30.             

Ito’y sa kabila ng dalawang petisyon na isinampa nina Albay Governor Joey Salceda at ng abogadong si Ernesto Fran­cisco Jr. sa Korte Suprema upang pigilan ang TRB at Manila Toll Expressway Sys­tems, Inc. (MATES) na magpa­tupad ng naturang pagtataas hanggang walang nagaganap na “public hearing”. 

Nabatid na kapag natuloy ang 250-percent increase ay papalo na sa P77 mula sa P22 ang sisingilin sa mga light vehicles tulad ng kotse, P155 naman sa mga buses na nga­yon ay nasa P43 at P232 mula sa P65 sa mga heavy trucks. Nanawagan naman ang 1-Utak Transport group kay Pa­ngulong Noynoy Aquino na agad na aksyunan na ang isyu sa toll fee hike bago ito tulu­yang maipa­tupad. Sinabi ng grupo na wala namang “con­gressional fran­chise” ang Southern Luzon Tollway Cor­poration para ma­bigyan ng awtorisasyon na maningil ng toll fee at bumabase lamang ito sa prangkisa ng Philippine Na­tional Construction Corporation (PNCC) na nag-expire na umano noong taong 2007 pa. Samantala, nagpa­tu­pad naman ng rollback sa presyo ng petrolyo ang mga mala­laking kompanya ng langis sa bansa. 

Dakong alas-12:01 ng ma­daling-araw nang ibaba ng Filipinas Shell at Chevron Philip­pines ng P.75 sentimos kada litro ang presyo ng diesel at P.50 sentimos naman kada litro ng gasolina. Dakong alas-6 naman ng umaga nang su­munod sa mga ito ang Petron Corporation.