Inidoro, lababo tinangay ng talunang konsehal

MANILA, Philippines - Ikinagulat ng marami ang kinahinatnan ng ku­warto ni Manila 3rd District Councilor Bernardito Ang nang ma­diskubre na bi­naklas ni dating­ 2nd District Councilor Ivy Varona ang mga gamit na nakalagay at nakakabit sa Room 461 na dating tang­gapan nito kabi­lang na ang   inodoro, lababo at pin­tuan ng banyo.

Dahil dito, naging tam­pulan ng kuwento ng kan­yang mga kapwa mga kon­sehal ang ginawang pag­tangay ni Varona ng mga konkretong gamit na nagging dahilan ng pag-alinga­saw ng mabahong amoy na nanggagaling sa banyo.

Nabatid kay Ang na binigyan ng pagkakataon ang mga nanalong konsehal na mamili ng kanilang ma­giging kuwarto.

Dahil isang beteranong konsehal, hinayaan ni Ang na maunang mamili ng kuwarto ang kanyang mga kasamang nanalong kon­sehal hanggang sa matira sa kanya ang ku­warto ni Varona na natalo sa na­karaang eleksiyon.

Hindi naman makontak si Varona hinggil sa isyu.

Ayon sa mga nakausap ng Pilipino Star Ngayon, nagulat ang lahat nang ma­laman na hindi pa maaaring okupahan ang kuwarto dahil wala itong inodoro, lababo maging pinto ng banyo.

Tinanggal din umano ng kampo ni Varona ang sa­lamin na nakakabit sa pader, kisame, switch ng ilaw , light bulbs at door closer.

Iniwan din ng kampo ni Varona ang tambak na basura.

Tinatayang aabot sa P500,000 ang magagastos upang maayos ang natu­rang opisina ni Ang.

Isa si 4th District Councilor Honey Lacuna sa mga nagulat sa iniwang tangga­pan ni Varona.