6 sapol sa kidlat: 1 patay

MANILA, Philippines - Isa ang namatay ha­bang limang iba pa ang nasugatan makaraang masapol ng kidlat kahapon sa Quezon City.

Dead-on-the-spot ang biktimang si Christian Peñalosa, 24, binata, scavenger ng Phase-7, Purok-16 Payatas-B, QC habang patuloy na gina­gamot sa East Avenue Medical Center (EAMC) at Quirino Memorial Medical Center (QMMC) ang mga nasugatan sa insidente na sina Janet Cumalingking, 21, Vergie delos Santos, 56; CheChe Ocho, 25; Menchie Baro, 36; may-asawa at Jesus Diones Sotto, 26; pawang mga scavenger din sa naturang lugar.

Sa ulat ni PO3 Pascual Fabreag ng Quezon City Police District-Criminal Investigation and Detection Unit (QCPD-CIDU) na­ganap ang insidente da­kong ala-1:45 ng hapon sa Payatas dumpsite sa Bgy. Payatas-B, Q.C.

Sinasabing nakaupo ang anim na biktima sa lugar at habang nagkuku­wentuhan at hinihintay ang parating na mga dump truck nang biglang bumu­hos ang malakas na ulan doon at saka kumidlat.

Ayon sa mga nakasaksi sa insidente na sina Louis Arogante at Jerry Morales, kasabay ng malakas na ulan ang pagkidlat hang­gang sa tinamaan ang mga biktima at tumilapon ng ilang metro.