Inagurasyon ni P-Noy payapa - NCRPO

MANILA, Philippines - Naging mapayapa ang inagurasyon ni Pa­ngu­long Benigno Aquino III na in­dikasyon na naging epek­tibo ang seguridad na ipi­natupad ng National Capital Regional Police Office (NCRPO) katu­wang ang iba pang ahen­sya ng pa­mahalaan.

Maliban sa narekord na dalawang insidente ng pan­­durukot sa Luneta, naging matiwasay naman ang panunumpa ni Aqui­no at ni Bise-Presidente Jejomar Binay.

Ayon kay NCRPO chief Director Roberto Rosales, umaabot sa 600,000 ang “estimated crowd” na nag­tungo sa Luneta upang sak­sihan ang pagluluklok sa ika-15 Pangulo ng bansa.

Kabilang sa naging hamon sa pulisya ang pagbibigay ng proteksyon sa 110 foreign dignitaries kabilang si East Timor Pre­sident Jose Ramos-Horta na sumaksi sa okasyon.

“We encountered no problem in Aquino’s oath-taking. The traffic went smoothly, especially in our courtesy lane and the criminal activities were totally checked,” ayon kay Ro­sales matapos magpa­kalat ng 3,200 pulis sa bisinidad ng Luneta.

Ipinagmalaki pa nito na nasiyahan umano ang mga dayuhang delegado parti­kular na ang mga nanggaling sa Canada sa seguridad na kanilang ibi­nigay mula airport hang­gang sa Quirino grandstand.

Mapayapa rin namang nabuwag ng NCRPO ang isang grupo ng mga rali­yista na nagsagawa ng demonstrasyon sa Sala­manca Park kasabay ng panunumpa ni Pangulong Aquino.