3 holdaper sinalvage

MANILA, Philippines - Magkakasunod na iti­numba ng mga hindi naki­kilalang salarin ang tatlong hinihinalang mga holdaper at magnanakaw na natag­puan ang mga bangkay sa magkakahiwalay na lugar sa Pasig City mula nitong na­karaang Sabado.

Pinakahuling natagpuan dakong alas-5:55 kahapon ng umaga sa tapat ng Palm­dale Condominium sa San­doval Ave., Brgy. Pinagbu­hatan ang bangkay ng isang lalaki na nasa pagitan ng 30-35 anyos, may taas na 5’5”, katamtaman ang katawan at nakasuot ng pulang t-shirt at maong na pantalon.

Tadtad ng tama ng sak­sak sa katawan ang biktima at nakapatong sa ibabaw ng katawan ang placard kung saan nakasaad ang kata­gang: “Holdaper kami huwag tularan.”

Dakong alas-10 naman ng umaga nang pagbabarilin ng hindi nakilalang lalaki ang 26-anyos na si Antonio Ma­ngundayao, Jr., ng no. 4057 Duhat Extension, Napico, Brgy. Manggahan, Pasig City. Nabatid na bumibili sa isang tindahan sa naturang lugar ang biktima nang lapitan ito ng tatlong lalaki at dalawang beses na pa­putukan ng kalibre .45 baril ng malapitan sa batok sanhi ng agad nitong kamatayan.

Bago tumakas, isa sa mga salarin ang nagpatong pa ng placard sa ibabaw ng bangkay ni Mangundayao na nakasulat ang katagang: “huwag tularan magnana­kaw, pusher.”

Nauna dito, dakong alas-4:10 kamakalawa ng ma­daling-araw nang matag­puan naman ang bangkay ng isang lalaki sa bakanteng lote sa may Eusebio sa Bgy. San Miguel, ng nasabing lungsod.

Inilarawana ang bangkay na nasa pagitan ng 30-35 anyos, maikli ang buhok, nakasuot ng asul na t-shirt at pantalong maong at tad­tad ng saksak sa ka­tawan.

Isang placard rin na na­kasulat ang katagang: “Wag tularan holdaper kami, ba­wal ang holdaper sa Pasig,” ang inilagay sa bangkay. Isang handbag rin ang na­tagpuan kung saan isang identification card ng isang Edgar Guban na bik­tima na sinasabing biktima ng hold-up ng nasawi.

Nahihirapan naman umano ang pulisya na re­solbahin ang magkaka­sunod na kaso dahil sa wala silang makuhang saksi sa mga krimen dahil na rin umano sa posibleng takot na sila naman ang balikan ng mga salarin.