MANILA, Philippines - Bangkay na nang madiskubre ang isang obrero habang nakabitin sa kisame ng kanyang tinutuluyang kuwarto matapos na magpakamatay sa hindi mabatid na kadahilanan sa lungsod Quezon.
Si Ruben Quintana Jr., 35, ng Mangahan Extension, Brgy. Bagumbayan ay nakaluhod pa habang nakabigti ang leeg nang madiskubre ng kanyang landlord na si Urbano Cruz.
Ayon kay PO3 Jaime Jimena ng Criminal Investigation and Detective Unit ng Quezon City Police, wala namang nakikitang dahilan ang mga kasamahan maging ang landlord ng nasawi na dahilan sa pagpapakamatay nito.
Plastic straw na ipinalupot sa kanyang leeg saka itinali sa kisame ang ginamit nito sa pagbibigti.
Ganap na alas 12:15 ng hatinggabi nang subukang tignan ni Cruz sa kanyang kuwarto ang biktima subalit tumambad sa kanyang harapan ang kalunus-lunos na kalagayan nito.
Inaalam pa ng awtoridad ang tunay na motibo ng nasabing insidente.