Parak tiklo sa P20-milyong cocaine

MANILA, Philippines - Bumagsak sa kamay ng PNP-Anti-Illegal Drug Special Operation Task Force (AID-SOTF) ang isang intelligence operative ng Aviation Security Group (AVSEGROUP) maka­raan makumpiskahan ito ng 4 na kilo ng cocaine na nagka­kahalaga ng P20-M sa isina­gawang drug-bust operation sa Pasig City nitong Martes ng gabi, ayon sa opisyal ka­hapon.

Kinilala ang naarestong suspect na si SPO1 Alexan­der Palara Estabillo, nakata­laga sa AVSEGROUP at residente ng Mayapis St., San Antonio Village, Makati City.

Sa isinumiteng report ni Supt. Ismael Fajardo, AID-SOTF, SOU (Special Opera­tions Unit)-3, dakong alas- 11:15 ng gabi nang  isagawa ang buy-bust operation sa tapat ng isang drug store sa Las Fiestas Drive Frontera Verde, Brgy. Ugong sa lung­sod ng Pasig.

Bago ang pagkakadakip sa suspect ay nagsagawa ng masusing surveillance ope­rations ang PNP-AIDSOTF operatives laban sa illegal nitong aktibidad.

Nasorpresa naman ang sus­pect sa raid na nagtang­kang tumakas pero naging maagap ang mga operatiba at agad itong pinosasan.

Nakumpiska sa suspect ang  4 kilo ng cocaine na tina­tayang may katumbas na ha­lagang  P20 milyon, 1 Glock 17, 2 magazine, paper bag na naglalaman ng boodle money na nagkakalaga ng P6 milyon.

Ang  suspect ay dinala sa Camp Crame at isinailalim  sa masusing imbestigasyon ha­bang dinala ang nasam­sam na mga ilegal na droga sa PNP-Crime Laboratory upang maisailalim sa pagsu­suri.

Naghihinala naman ang mga awtoridad na ang na­kum­piskang cocaine sa suspect  ay kabilang sa 2 to­ne­­ladang droga na itinapon ng mga tripulanteng Chinese sa karagatan ng Samar noong Disyembre 2009.

Patuloy naman ang pina­lakas na anti-drug operations ng PNP sa iba’t ibang bahagi ng bansa.