344 dayuhan nag-avail ng BI job visa

MANILA, Philippines - Umaabot na sa 344 na dayuhang investors mula sa 39 bansa ang nakakuha ng special visa for employment generation (SVEG) ng Bureau of Immigration (BI).

Sa ulat ng BI-SVEG one-stop-shop center kay Immigration Commissioner Marcelino Libanan, lumalabas na 141 Korean investors ang nangunguna sa listahan ng visa applicants simula ng ipatupad ang nasabing programa simula noong Abril ng nakaraang taon.

Naniniwala naman si BI legal officer Cris Villalobos, pinuno ng one-stop-shop na ang job visa program ay aani ng suporta mula sa susunod na administrasyon ni President elect Benigno Aquino III.

Base sa ilalim ng alituntunin, ang SVEG ay iniisyu sa mga foreign businessman o expatriate na mayroong investments o employed sa isang business enterprise na mayrong mahigit sa 10 o mahigit pang regular o fulltime Filipino workers.

May karapatan ang visa holder na manatili sa bansa hanggang kailan nito nais hanggang mayroong itong negosyo o investment sa Pilipinas.

Nabatid na simula noong Mayo umaabot na sa 530 dayuhan ang nabigyan ng SVEG kabilang dito ang 344 priincipal applicants at 185 na kanilang mga dependents kung saan nagbayad ang mga ito ng umaabot sa P6.7 million immigration fees.