14 tiklo: Diploma mill sa Maynila sinalakay

MANILA, Philippines - Bunsod na rin ng mga rek­lamong natatanggap ni Manila City Administrator Jesus Mari Marzan, 14 katao na respon­sable sa paggawa ng mga pe­keng diploma at iba pang docu­ments  sa kahabaan ng  Claro M. Recto sa Maynila ang bumagsak sa kamay ng mga operatiba kahapon.

Ayon kay Marzan, walang tigil ang dagsa ng reklamo sa kanilang tanggapan kung kaya’t agad na isinagawa ang pagsalakay sa pagawaan ng pekeng diploma at iba pang dokumento na ikinagulat pa ng mga suspect.

Ani Marzan seryoso silang walisin ang lahat ng uri ng pamemeke sa lungsod upang tuluyan ng mabura ang taguri sa Maynila bilang sentro ng ‘fake diploma mill’.

Kabilang sa mga naaresto at nahaharap sa kasong falsi­fication of public documents at violation of Revised Ordi­nance 1119 (Obstruction/fixer) sina Crisanto Borja, Jomer Do­mingo, Mark Anthony Mus­tasa, Alfredo Castro, Leo­nardo Sambillo, Grace Santo, Emma Lim, Zeny Castillo, Lando Jolo­gado, Bombet Franias, Ed­mund Era, Oscar Magno, Cris­pin Francisco at Myla Tuazon.

Nabatid sa ulat na tina­tayang umaabot ng mula P500 hanggang P1,000 ang halaga ng pagpapagawa ng pekeng diploma at transcript of records depende sa kole­hiyo o pamantasan na gaga­mi­tin. Mas mahal naman kung exclusive schools at kilalang state university ang papalsi­pi­kahing diploma at transcripts.

Nabatid na maging birth certificates, drivers license at maging pekeng mga titulo ng lupa ay minamaniobra sa lugar na ito ng C.M. Recto at Sta. Cruz area.