Dayo na driver, dinedo

MANILA, Philippines - Nanawagan ang Manila Police District (MPD) sa kaanak ng napatay na pedicab driver na sinasabing dumayo lamang  at walang nakakakilala, sa Binondo, Maynila, kama­kalawa ng hapon.

Nagpakilala lamang umanong “Jojo” ang biktimang inilarawan sa edad na 25 hanggang 30 at may tattoo na “BCJ” (Batang City Jail) sa katawan.

Sa ulat ni Det. Virgilio Martinez ng Manila Police District-Homicide Section, dakong alas-5:20 ng hapon nang barilin ang biktima sa harap ng Area H, Gate 64, Access Road ng ICTSI, MICP, Binondo. Naglalakad lamang sa lugar ang biktima nang lapitan umano ng suspect at saka binaril sa batok na naging dahilan ng agarang kamatayan nito.

Nabatid na dalawang linggo pa lamang na lumalabas ng pedicab ang biktima sa operator na si Johnny Antonio at walang nakakaalam kung saan nakatira ito at wala ding alam na kaanak. Maaari umanong kilalanin ang bangkay na inilagak sa St. Harold Funeral Homes.