MANILA, Philippines - Sasailalim sa training ang mga empleyado ng Bureau of Immigration (BI) sa paggamit ng mga makabagong teknolohiya at equipment hindi lamang sa main office ng BI kundi maging sa mga pangunahing paliparan sa bansa.
Base sa inilabas na kautusan ni Immigration Commissioner Marcelino Libanan, inatasan nito ang 34 BI employees na makilahok sa service training program para sa immigration officers sa Philippine Immigration Academy sa Clark Field, Angeles, Pampanga na nagsimula nang ganapin noong Mayo 25 hanggang June 3.
Layunin umano ng nasabing training na patuloy na lumalim ang kaalaman at skills ng rank and file employees ng BI dahil sa patuloy ang pagyakap ng Pinoy sa mga makabagong teknolohiya at ginagamit na rin ito sa pang araw-araw na trabaho kayat dapat lamang na mayroong kaalaman ang mga empleyado ng BI.
Idinagdag pa ni Libanan na patuloy na gagamit ang BI ng mga makabagong kagamitan at programa na maaring ikumpara sa iba pang makabagong kagamitan na ginagamit ng ibang mga bansa. Pangungunahan ang training program ng BI Center for Training and Research sa pangunguna ni director Simeon Vallda kasunod nito ang post oral evaluation process at ang dalawang araw na on the job training sa Ninoy Aquino International Airport sa June 7 at 8.