Sumabit sa estribo ng jeepney: Bagets nalaglag, patay

MANILA, Philippines - Buhay ang naging kapalit ng pagsabit ng isang 16-anyos na binatilyo ng isang umaandar na pampa­sahe­rong jeep ng makaraang malaglag ito at masawi kamakalawa sa Barangay San Roque, Marikina City.

Patay na nang maisugod sa Amang Rodriguez Medical Center ang biktimang si Carrt Tabilo, estudyante, re­sidente ng 06 General Mo­lina street, Barangay Parang ng naturang lungsod.

Pinaghahanap at ina­alam pa ng pulisya ang pag­ka­kakilanlan sa tumakas na driver ng pampasaherong jeep na hindi rin naplakahan.

Sa ulat ng Marikina Police, naganap ang aksidente dakong alas-5:30 ng hapon sa kahabaan ng Gil Fer­nando Avenue, Barangay San Roque.

Nabatid na nakasabit ang biktima sa naturang jeep na may biyaheng pa-San Ma­teo nang biglang malaglag ito sa behikulo at mabagok ang ulo sa sementadong kalsada.

Rumeponde naman ang mga nagmagandang-loob na taumbayan at opisyal ng barangay na nagsugod sa biktima sa pagamutan ngu­nit hindi na rin naisalba ang buhay nito.

Nanawagan naman ang Marikina police sa suspek na kusang-loob na sumuko upang hindi na madagdagan ang kaso nito habang nanawagan rin sa mga pasahero ng naturang jeep na makipagtulungan sa ka­nila at ituro ang driver upang mabigyan ng katarungan ang binatilyong nasawi.