Holdaper todas sa police escort

MANILA, Philippines - Isa sa dalawang hini­hi­nalang holdaper-snatcher ang napatay ng isang ta­uhan ng pulisya na naka­talaga sa Camp Crame matapos mang­hablot ng kwintas sa ineeskortang VIP, ha­bang binabagtas ang ka­habaan ng Taft Avenue, Ermita, Maynila, kamaka­lawa ng gabi.

Namatay noon din ang suspect na inilara­wan sa edad na 35, ka­tamtaman ang panga­nga­tawan, may tattoo na “Raymund Bal­yada” sa likod, habang ang isa pang suspek na ka-riding in tandem nito ay na­katakas dala ang kwintas at armas na ginamit sa panunutok.

Kinilala naman ang na­kabaril na si PO2 Jesus Salvador Jr., 29, binata, na­­katalaga sa PNP-PSPG, sa Camp Crame.

Sugatan naman at ginagamot sa Ospital ng Maynila si Juniel Guelas, 17, estudyante na tina­maan ng bala sa ka­liwang paa.

Sa imbestigasyon, dakong alas-6 ng gabi nang maganap ang insi­dente sa panulukan ng Qui­rino at Taft Avenue sa Ermita, Maynila.

Sinabi ni Salvador na sakay ito ng isang Ford F-150 kasama ang ini-escortan nitong isang VIP na nakaupo sa pas­senger seat habang ba­hagyang nakabukas ang bintana nito at naniniga­rilyo nang pagsapit sa nasabing lugar ay lapitan siya ng mga sus­pek, tinu­tukan ito ng baril at hinab­lot ang kuwintas nitong nagkakahalaga ng P50,000.

Agad namang bu­maba ang escort na si PO2 Sal­vador subalit siya ay tinu­tukan umano ng baril kaya inunahan niya itong pu­tukan.

May tama na ang sus­pek nang sumakay ito sa motorsiklo ng kaniyang ka­sama subalit hindi pa naka­lalayo ay bumagsak na ito sa kalye mula sa motorsiklo, kaya iniwan na siya ng kasamahang sus­pek.