Kampanya sa 'no plate no travel' pinaigting

MANILA, Philippines - Ipinag-utos ng National Capital Regional Police Office (NCRPO) sa lahat ng limang police districts na paigtingin ang kampanya sa “no plate no travel policy” ng pulisya upang higit na malabanan ang pa­tuloy na nagaganap na car­napping sa Metro Manila.

Ito’y sa kabila na bumaba na umano ang tinatangay na sa­sakyan sa 1 hanggang 2 be­hi­kulo kada araw buhat sa dating 4 hanggang 6 na kotse o motor­siklo kada araw noong nakara­ang taon.

Sa imbestigasyon ng pu­lisya, patuloy pa ring naga­ga­nap ang carnapping dahil sa ginagamit ito ng mga sin­di­kato hindi na para ibenta ngunit upang gamiting “get-away ve­hicle” sa operasyon nila sa “hi­jacking, kidnap­ping, at robbery. Sinabi ni NCRPO chief, Director Roberto Ro­sales, sa tuwing tu­ma­taas ang bilang ng carnap­ping, nagha­handa na umano sila sa po­sibleng pagsalakay ng mga sindikato ng robbery o kid­napping.

Nararapat umano na ma­su­portahan ang “no plate no travel policy” at ang “total gun ban” na kanilang ipinatu­tupad upang malimita ang galaw ng mga kriminal.

Ipinag-utos din ni Rosales na kumpiskahin ang mga hindi awtorisadong plaka tulad ng mga “expired commemo­rative plates”, mga comme­mo­rative plates na nakapa­tong sa ori­hinal na plaka buhat sa Land Transportation Office, at mga gawa-gawang plaka na kara­niwang ikinakabit sa mga motorsiklo.

Samantala, tiniyak naman ni Rosales ang maigting na pagpapatupad ng seguridad ngayong Semana Santa kung saan posibleng sumalakay ang mga “Akyat-Bahay at Dugo-Dugo Gang”. Itinaas sa “heightened alert” ang buong NCRPO. (Danilo Garcia)