Lim, et al nahaharap sa panibagong kaso

MANILA, Philippines - Nakatakdang sampa­han ng panibagong kaso ng katiwalian ang mata­taas na opisyal ng Manila City hall ngayong araw sa Office of the Ombudsman.

Ito na ang pangala­wang kasong paglabag sa anti-graft and corrupt practices act na isinampa ni Atty.Reynaldo Bagatsing laban kina Manila Mayor Alfredo Lim at mga opisyal nito kaugnay sa umano’y moro-moro or rigged public bidding sa nakatakdang repair at upgrading works ng 13 elementary at 2 high school sa lungsod na nag­kakahalaga ng P23,550,000.    

Si Bagatsing ay pa­ngulo ng Philippine Anti-Graft Crusaders, Inc. (PAGCI) kung saan bukod kay Lim kinasuhan din nito sina Secretary to the Mayor Rafaelito Garay­blas, chairman ng bid and awards committee; City Legal Officer Renato de la Cruz, OIC-Treasurer Vicky R. Sanchez at ibang pang BAC members.

Lumiham din si Bagat­sing kay Commission on Audit Chairman Rey Villar na agad maglabas ng ka­utu­san na ihinto ang pag­bayad sa mga nana­long contractor at ipawa­lang bisa ang mga kontrata na naipagkaloob sa mga ito.

Nauna ng kinasuhan ni Bagatsing si Lim dahil sa ben­ta­han ng Century Park Hotel at ng 4.5 hektar­yang lupain na kinakati­rikan nito sa halagang P1 bilyon lamang samanta­lang ang tunay na market price o halaga nito ay hindi ba­baba sa P4 bilyon. (Gemma Amargo-Garcia)