Burol ng anak ni Cesar, isasapribado

MANILA, Philippines - Gagawing  pribado ang burol ng anak ni Cesar Mon­tano na si Christian Angelo Manhilot.

Ang hakbang ay desisyon umano ng pamilya upang magkaroon ng privacy sa pagdadalamhati sa yumaong anak ng aktor.

Hindi umano basta-basta  pinapapasok  ang mga tao  sa Arlington Memorial Chapel kung saan nakalagak ang labi ni Manhilot maliban sa kakilala ng pamilya.

Sinasabing sa Arlington na rin umano natulog kagabi ang mag-asawang Cesar at Sunshine Cruz dahil sa sobrang pagod ng dalawa.

Sa ngayon ay wala pa ring ipinapalabas na pahayag ang pamilya ni Cesar kung ililibing o iki-cremate  ang labi ng anak ngunit batay sa inisyal na pag-uusap ay mas gusto na lang umano ng pamilya na i-cremate ang labi ni Manhilot. Si Manhilot ay nasawi makaraang mag­baril sa sarili sa loob ng kanilang tahanan kama­kalawa ng madaling-araw dahil umano sa problema sa pag-ibig. (Angie dela Cruz)