'Nanunog' kinatay ng mga nasunugan

MANILA, Philippines - Burdado ng tatlum­pung saksak ang bang­kay ng isang lalaki na pinaniniwalaang kinuyog ng mga residenteng na­walan ng bahay, ilang oras matapos umamin na siya ang dahilan  ng su­nog na naganap noong Martes sa Sampaloc, Maynila.

Kahapon ng mada­ling-araw nadiskubre ang nakabulagtang bangkay ng biktimang kinilalang si Benjamin Flores, 42, ng   Norma St., Sampaloc, at miyembro umano ng Ba­hala na Gang.

Ayon kay C/Insp. Erwin Margarejo, hepe ng MPD-Homicide Sec­tion, “ Hindi pa humuhupa ang sobrang galit ng mga nasunugan kasi sa it­sura ng bangkay, may in­ten­siyon na patayin siya.”

Aniya, mistulang nag­ta­takipan ang mga resi­dente dahil walang ma­kapagsabi kung sinu-sino ang kumatay sa biktima.

Sa imbestigasyon, na­kita na lamang ang bangkay ng biktima sa tapat ng bahay sa panu­lukan ng Norma at Luzon Sts., ng mga tambay dakong alas-4:30 ng madaling-araw.

Una umanong inakala ng mga tambay na lasing na naman ang biktima at nakatulog lamang sa kalye subalit nakita uma­no ang mga dugo na uma­agos sa katawan nito. Tatlumpung saksak sa katawan ang tinamo nito.

Sa panig naman ng MPD-Station 4 chief, Supt. Ramon Pranada, nakuha nila ang impor­mas­yon na inaba­ngan umano ang biktima ng ilang residente nang mag­tungo ito sa tangga­pan ng Barangay 564 Zone 55, District 4 dahil nalaman ng mga ito na ka­kausapin siya ni Chair­man Alex Fontaina hing­gil sa insidente ng sunog na nagmula sa kaniyang bahay.

Pag-alis umano sa barangay hall ng biktima ay binuntutan na ito ng mga galit na nasunugan at pinaghalinhinang sak­sakin.

Matatandaang nasa 20 kabahayan ang nasu­nog sa nasabing lugar dakong alas-2:10 ng ha­pon noong Martes at iti­nu­turong pinagsimulan ng apoy ang bahay ni Flores. Isang Junior Mayo, 44, ang nasugatan sa insidente.

Naiulat rin ng Manila Fire Bureau na ang dahilan ng sunog ay ang naiwanang niluluto ni Flores matapos makatu­log dahil umano sa sob­rang kalasingan.