MANILA, Philippines - Umaabot sa 40 kilong isdang dalagang bukid (Red Saud) ang kinumpiska ng mga tauhan ng Veterinary Inspection Board (VIB) kamakalawa sa Antipolo Market sa Blumentritt, Sta. Cruz, Maynila matapos mapag-alamang itinubog ito sa jobos.
Sa report na tinanggap ni City Administrator Jesus Mari Marzan ng Manila City Hall mula kay Joselito Diaz, Team Leader ng VIB-Special Meat Squad, nagsasagawa sila ng inspeksiyon nang mapansin ang mapulang kulay ng isdang dalagang bukid na itinitinda ni Zenaida dela Cruz.
Dito ay inamin ni dela Cruz na gumagamit sila ng jobos upang maging maganda at magmukhang sariwa ang mga isda.
Ayon naman kay Marzan, hindi na pagtitindahin si dela Cruz matapos na mapatunayang lumabag sa City Ordinance 1600 Section 998 o Adulteration.
Giit ni Marzan, delikadong makain ang mga isdang may jobos lalo pa’t pumapasok ito sa loob ng katawan ng tao.
Aniya, ang kalusugan ng consumers ang dapat na bigyan ng prayoridad at hindi ang pagnenegosyo ng ilang mga negosyante. (Doris Franche)