MANILA, Philippines - Isang dalaga ang nagpakamatay sa pamamagitan ng pagbigti sa sarili matapos na magtalo ng kanyang kinakasama sa lungsod Quezon, iniulat kahapon.
Nakilala ang nasawi na si Liberiza Disipolo, 26, accounting personnel ng Advance Pages Hills at residente sa Rivera compound, Del Rey Subdivision, Baesa Caloocan City.
Sa ulat ni SPO1 Florencio Escobido, may-hawak ng kaso, alas-9 ng umaga nang matagpuan ng kanyang live-in partner na si Ricardo Abdao III, 19, ang biktima habang nakabitin sa kisame ng kanyang tinutuluyan.
Bago ang insidente, nagkaroon umano ng hindi pagkakaunawaan ang biktima at si Abdao noong Linggo ng gabi dahil sa pagtanggi umano ng huli na pumunta sila sa Bulacan.
Ayon kay Abdao, huling mensahe sa text na natanggap niya sa biktima ay ganap na alas-3:10 ng umaga ilang oras bago ito natagpuang nakabitin.
Ayon sa pulisya, base sa nakuha nilang impormasyon, natatakot umano ang biktima na iwan siya ng kanyang kinakasamang si Abdao dahil labis ang pagmamahal niya dito.
Gayunman, patuloy ang imbestigasyon ng awtoridad sa nasabing insidente. (Ricky Tulipat)