Pamilya nalason sa salay-salay, 1 patay

MANILA, Philippines - Nakatakdang ipasuri ng Pasay City police ang sam­pol ng pinangat na isdang salay-salay sa Bureau of Food and Drugs upang ma­batid kung ito ang sanhi ng pagkalason ng anim na mi­yembro ng isang pa­milya kung saan nasawi ang isang 74-anyos na lolo, kama­ka­lawa ng hapon.

Tumanggi naman ang mga kapamilya na ipa-otopsiya ang bang­kay ni Lolo Guillermo Hernan­dez, ng No.163 St. Claire Street, Brgy. Maricaban, Pasay City. Nananatili namang ino­obserbahan sa Pasay City Ge­neral Hospital sina Marian Boque, 30; mga anak nitong sina Mikaela, 7; Catherine, 8; bayaw na si Virgilio Her­nandez, 14; at pa­mang­kin na si Alfea Torres, 3-anyos.

Sa ulat ni PO3 Simon Res­picio, ng Pasay Station Investigation and Detective Management Section, ta­nging pina­ngat na salay-salay ang kinain ng pamilya sa kanilang ha­pu­nan na binili ni Marian noong Miyer­kules ng hapon sa isang tali­papa. Pinanin­digan ni Marian na hindi bilasa ang nabili niyang isda dahil sa wala itong amoy.

Kamakalawa ng umaga, pawang nagrek­lamo ng pana­nakit ng tiyan, pag­susuka ang buong pa­milya kaya nagtungo na ang mga ito sa paga­mutan. Na­iwan naman ang kani­lang lolo.

Dakong alas-4:30 ng hapon kahapon nang isugod na ng kanilang mga kapit­bahay si Her­nandez sa pare­hong ospital nang magrek­lamo na rin ito ng ma­tinding sakit ng tiyan ngunit hindi na umabot ng buhay.