Sindikato ng human smuggling, bisto ng BI

MANILA, Philippines - Napigilan ng mga Immi­gra­tion Officers sa Ninoy Aquino International Airport (NAIA) ang tangkang human smuggling patungong Ca­nada ng isang sindikato na gina­gamit ang Manila bilang transit point.

Sa ulat kay Bureau of Im­migration (BI) Commissioner Marcelino Libanan ni BI airport operations division chief Ferdinand Sampol napigilan ang sinasabing human traf­ficking operation noong Lunes matapos na maaresto ang courier nito at dalawa niyang biktima sa NAIA.

Sinabi naman ni Libanan na ang pagkakaharang sa mga biktima at pagkakaaresto sa suspek ay resulta ng tamang paraan ng training sa mg BI personnel at sa pama­magitan na rin ng maka­bagong teknolohiya.

Kinilala naman ni Sampol ang courier ng sindikato na si Joana Lee May Lin, isang Singa­porean at ang mga ka­sa­ma nitong sina Jeremy Lim Chee Siong at Jimmy Ong Lai Heng kapwa Chinese na­tionals. Ang tatlong pasahero umano ay nasabat sa NAIA terminal 2 bago sila sumakay sa Philippine Airlines patu­ngong Vancouver, Canada noong Marso 1.

Nabatid na gamit nila Lim at Ong ang isang pekeng Singaporean passport pala­bas ng bansa upang maka­pag­trabaho sa Canada subalit noong dumating sila sa bansa ay gamit nila ang kanilang orihinal na pasaporte.

Ang tatlong dayuhan ay minanmanan ng mga miyem­bro ng BI-Monitoring Com­pliance and Migration Group (MCMG) sa airport matapos nilang pagdudahan si Lee na umaakto ring interpreter ng kanyang mga kasama.

Sa interogasyon kay Lim at Ong, inamin nila na bina­yaran nila ang mga sindikato ng halagang US$ 20,000 at US$ 30,000 para sa pagpro­seso ng kanilang biyahe sa Canada.

Nadiskubre din ng BI-anti fraud division na peke ang mga pasaporte ng mga ito. (Gemma Amargo-Garcia)