Bus passengers binalaan sa bagong grupo ng mandurukot

MANILA, Philippines - Nagbabala ang pa­mu­­nuan ng Quezon City Police sa mga sumasa­kay sa pampasaherong bus na mag-ingat mata­pos mapaulat ang bigong pagsalakay ng pitong kalalakihang mandurukot sa isang bus sa kaha­baan ng Edsa kahapon ng umaga.

Reaksyon ito ng pu­lisya makaraang humingi ng tulong sa himpilan ng Police Station 10 ng QCPD ang driver ng Five Star Bus na si Roberto Belmonte at conductor na si Salvador Trinidad dahil sa pag-atake ng pito hanggang siyam na kala­lakihan sa kanilang bus.

Ang nasabing mga suspek ay hindi mga armado ngunit ang pakay ay dukutan ang mga ka­tabi nilang mga pasahero sa nasabing bus.

Sinabi ni Belmonte na sumakay umano ang mga suspek sa kanilang bus at nagkunwaring mga pa­ sahero pasado alas-5:00 ng madaling -araw.

Naghiwalay-hiwalay ng upuan ang mga sus­pek at pagsapit sa Edsa corner Timog, napuna umano ni Salvador ang isa sa mga suspek na dinudukot ang pitaka ng isang pasahero.

Pinigilan ni Salvador ang suspek dahilan upang maalarma ang mga ito at agad na magsipag­babaan.

Ngunit, bago tuluyang lumayo, nagsipagdampot ang mga suspek ng bato at pinagbabato ang bus sanhi upang magka­basag basag ang bintana at windshield nito. (Ricky Tulipat)