Shaina Magdayao, kinasuhan ng BIR

MANILA, Philippines - Kinasuhan ng  Bureau of Internal Revenue  (BIR) sa Quezon City Prosecutors Office ang aktres na si  Shaina Magdayao dahilan sa umanoy pagkabigo nitong iprisenta sa BIR ang kanyang  accounting at revenue records noong  2007.

Sa dalawang pahi­nang  complaint affidavit,  inakusahan ng BIR si Mag­dayao sa pamamagitan nina Geraldine Llaguno at Oliver Correa ng BIR Legal Division na lumabag sa Tax Code dahil sa hindi nito pagpa­pakita sa ahensiya ng books of accounts at iba pang  accounting records para sa taong 2007. Sa ilalim ng  Tax Reform Act of 1997, ang sinumang lala­bag dito ay magmu­multa ng mula P5,000  hang­gang P10,000 at pagkakulong mula 1 hang­gang 2 taon.

Sinasabi ng BIR na si Magdayao na may business address sa North Susana Village Fairview, Quezon City ay pinadalhan ng  tax verification notice (TVN)  noong  April 2009 kung saan hinihiling ng BIR sa aktres na magprisinta ng kaukulang record ng kanyang internal revenue taxes para sa taong  2007. 

Ang  TVN ay tinanggap ng isang Laura de Leon. Mangilang beses na uma­nong personal na nag-follow­ up kay Magdayao at marami ring ginawang pagtawag sa telepono dito pero bigo pa rin ang aktres na aksiyunan ang hinihi­nging dokumento ng BIR.

Noong  October 2009 ay nagpadala ng subpoena ang BIR kay Mag­dayao para pumunta sa Legal Division at dalhin ang kanyang  books of accounts at ibang accounting records pero bigong mag­tungo dito ang aktres kahit na siya mismo ang naka­tanggap at pumirma ng subpoena ng BIR. (Angie dela Cruz)