MANILA, Philippines - Hinihinalang pinatay ng mga itinataboy na scavenger at tambay ang isang sekyu sa isang parking lot sa Sta. Cruz, Maynila, kahapon ng madaling-araw.
Patay na nang matagpuan ang biktimang si Rodolfo Bouma, ng San Bartolome, Novaliches Quezon City dahil sa mga saksak sa katawan.
Hindi pa matukoy kung sino o sinu-sino ang responsable sa pamamaslang.
Sa ulat ng pulisya, dakong ala-1:00 ng madaling-araw nang makitang patay ang biktima sa isang parking area sa harapan ng Philippine National Bank sa 548 Florentino St., Sta Cruz, Maynila.
Dakong alas-12:05 nang madaling-araw nang huling makitang buhay ang biktima.
Pinaniniwalaang posibleng may nagagalit umano sa sekyu dahil ginagawang tulugan ng mga basurero at palaboy ang binabantayan nitong parking area na madalas nitong itinataboy. (Ludy Bermudo)