MANILA, Philippines - Hinihinalang dahil sa sugal na “kara y cruz” ang ugat sa pamamaslang ng isang hindi pa nakikilalang lalaki sa isang driver na binaril ng malapitan sa mukha, kamakalawa ng gabi sa Parañaque City.
Hindi na umabot pang buhay sa Parañaque Community Hospital ang biktimang nakilalang si Jobeth Barro, 33 ng Block 4 Purok Riverside, Brgy. Sun Valley, ng naturang lungsod.
Agad namang tumakas ang hindi pa nakilalang suspek dala ang armas na ginamit sa krimen.
Sa ulat ng pulisya, naganap ang insidente dakong alas-8 ng gabi sa isang eskinita sa Villa Paraiso, sa Brgy. Sun Valley habang papauwi na ang biktima nang lapitan ng isang hindi nakilalang lalaki at agad na paputukan ng baril sa mukha bago mabilis na tumakas.
Sa imbestigasyon ng mga awtoridad, nabatid na galing umano ang nasawi sa pagsusugal ng kara y cruz na umaabot na sa libo ang pustahan. Isang manlalaro umano ang nakatalo ng biktima dahil sa akusasyon ng pandaraya. (Danilo Garcia)