Ex convict, balik kalaboso

MANILA, Philippines - Kalalaya pa lamang sa Sab­layan Penal Colony ma­tapos ang may 16 na taong pagkakakulong, kalaboso muli ang kinabagsakan ng isang 40-anyos na convicted sa kasong murder matapos magnakaw at mangmolestiya kamakalawa ng gabi sa Tondo, Maynila.

Kinilala ang suspek na si Romeo Balatbat, miyembro ng Commando Gang, resi­dente ng #1048 Solis St., Tondo, Maynila.

Sa ulat ni C/Insp. Edgardo Carpio, hepe ng Manila Police District-Theft and Robbery Section, naghain ng reklamo laban sa suspek sina Aileen Decena, 18; Eva Ramos, 43; at Jelly Vistro, 19; pawang re­sidente ng Tondo, Maynila.

Kapitbahay umano sila ng suspek kaya sinamantala nito ang mahimbing nilang pag­tulog dakong alas-2 ng ma­daling-araw, nang pasukin sila sa upahang kuwarto.

Nagising umano si Vistro nang maramdaman na may humihimas sa kanyang hita patungo sa kanyang kasela­nan. Nang dumilat ay nakita niyang nakahawak sa kan­yang hita si Balatbat habang may hawak umanong patalim.

Binantaan pa ng suspek si Vistro na huwag gagawa ng ingay at may masamang mang­yayari sa kanila, bago tuluyang umalis bitbit umano ang mga cellphone ng mga bik­tima at P5,000 cash.

Naispatan naman ng mga tanod ang papatakas na sus­pect kaya sinunggaban ito at muling naaresto. (Ludy Bermudo)