MANILA, Philippines - Isang security guard ang pinaslang ng mga hinihinalang magnanakaw na nagtangkang looban ang binabantayan nitong restaurant sa lungsod Quezon, kahapon ng madaling-araw.
Kinilala ang biktima na si Ronald Limbo, 38, ng Boac, Catanduanes at nanunuluyan sa Kowloon House na matatagpuan sa Matalino St., Brgy. Central sa lungsod.
Ayon sa ulat, nakagapos ang mga kamay at natatapalan ng packaging tape ang bibig ng biktima at tadtad din ng saksak sa buong katawan nang matagpuan ito ng mga empleyado ng nasabing restaurant.
Dagdag pa ng pulisya, pagnanakaw ang pakay ng mga salarin ngunit nabigo ang mga ito matapos na hindi mabuksan ang vault ng nasabing restaurant.
Natuklasan ang bangkay ng biktima sa harap ng Kowloon House na matatagpuan sa #20 Matalino St., sa lungsod ganap na alas-4:20 ng madaling- araw.
Ayon sa ulat, tanging si Limbo lamang ang bantay sa nasabing kainan nang mangyari ang insidente.
Sinasabing magpapaalam na sanang umuwi ang cook at mga waitress ng nasabing resto sa biktima, nang makita nila itong nakahandusay sa mismong pasukan ng mga empleyado habang naliligo sa sarili niyang dugo.
Patuloy pa rin ang isinasagawang imbestigasyon sa nasabing insidente. (Ricky Tulipat)