Lolo nabundol ng taxi, patay

MANILA, Philippines - Namatay ang isang 77 anyos na lolo makaraang mabundol ng isang rumaragasang taxi habang papasakay sa isang jeep kamakalawa ng madaling-araw sa Malibay, Pasay City.

Hindi na nagawang maisalba ng mga manggagamot ng National Orthopedic Hospital ang biktimang si Agripino Pangulong, biyudo, ng no. 67 Bunye Compound, Barangay Cupang, Muntinlupa City.

Sumuko naman ang driver ng taxi na si Salvador Sacyis, nasa hustong edad. Naganap ang insidente dakong ala-1:15 ng madaling araw sa EDSA, Malibay. Papasakay sa isang pampasaherong jeep ang biktima nang mabangga ng naturang taxi ang jeep at biktima sanhi upang tumilapon ito.

Idinipensa naman ni Sacvis na ginitgit umano siya ng isang pampasaherong bus kaya napakabig siya at nabangga ang jeep na nagsasakay ng pasahero. (Danilo Garcia)