Masamang tumitig, itinumba

MANILA, Philippines - Isang nursing student na napagbintangang masamang tumitig ang pinagbabaril hanggang mapatay ng isa sa anim na lalaking kumom­pronta sa kanya sa Barangay Damayan, San Francisco del Monte, Quezon City kamaka­lawa ng gabi.

Nagtamo ng maraming tama ng bala sa katawan ang biktimang si Mar Jove Beltran, 24 anyos, estudyante ng Arellano University at resi­dente ng Teachers Village sa Quezon City.

Natukoy naman ang sus­pek na bumaril kay Beltran na si Roberto Santos, alyas Obet, ng # 7 Santos St., Brgy. Damayan at itinuturing na lider ng grupo kasama ang mga alyas na Botchok, Fetus, Peke, Cloyd, at Boyong na nga­yon ay tinutugis na ng pulisya.

Ayon kay PO2 Hermo­genes Capili, may-hawak ng kaso, nangyari ang insidente sa may Wilson St., Barangay Damayan bandang alas-11:00 ng gabi.

Nakikipag-inuman si Beltran sa kanyang mga kaibigan nang dumating ang mga suspek, nilapitan siya bago isa sa mga ito ang nag­sabing “Yan, yung masamang tumitig.”

Kasunod nito, bigla na lamang binubog ng mga sus­pek si Beltran hanggang sa bumunot ng baril si Obet at pinagbabaril ang biktima.

Matapos isagawa ang krimen, sabay sabay na uma­lis ang mga suspek sakay ng dalawang tricycle na ang isa ay may tatak na Damapatoda na pawang for registration. (Ricky Tulipat)