Chairman binoga ng prexy ng kompanya

MANILA, Philippines - Matapos magtalo hinggil sa pamamalakad sa kanilang kumpanya, isang chairman of the board ang binaril ng ka­nilang presidente kamaka­lawa sa Caloocan City.

Sugatan at inoobserbahan sa Chinese General Hospital ang biktimang si Edgar Tang, 46, chairman of the board ng Megapack Container Corporation at residente ng Grace Village, Quezon City.

Pinaghahanap naman si Salvador Lara, presidente ng kompanya at naninirahan sa   Valle Verde, Pasig City.

Sa inisyal na imbestigasyon ng Caloocan City Police, da­kong alas-2:15 ng hapon, nag­tatalo ang biktima at ang suspek sa loob ng nasabing kompanya sa General Tirona St., Bagong Barrio ng lungsod na ito.

Binunot ng suspek ang dalang baril at pinutukan si Tang bago tumakas habang dinala naman ang biktima sa nabang­git na pagamutan ng ilang tauhan nito. Habang sinusulat ang bali­ tang ito, patuloy pang nagsasa­gawa ng follow-up operation ang mga pulis hinggil sa naturang insidente. (Lordeth Bonilla)