Camp Crame nilooban

MANILA, Philippines - Sa gitna na rin ng kasaya­han sa mismong araw ng pagdi­riwang ng Pasko at ika-55 ka­ara­wan ni PNP Chief Director General Jesus Ver­zosa, nilo­oban ng hindi nakilalang mga kawatan ang PNP Press Corps Office sa Camp Crame, Quezon City, ayon sa ulat kahapon.

Ang nakawan ay nadiskubre dakong alas-8 ng umaga ka­hapon ni Dominador “Mang Entong” Arnaldo, janitor/striker ng PNP Press Corps.

Ayon kay Mang Entong, na­gulat na lamang umano siya ng makitang putol ang mga kable at nawawala na ang television set at ang audio video equip­ment sa briefing area ng PNP Press Corps.

Sa panig ni PO3 Lauro Sala­zar, duty officer ng mangyari ang insidente, hindi umano niya napansin ang nakawan dahilan nasa itaas siya at nakasara ang pinto sa PIO kung saan nasa ibaba lamang nito ang pinag­nakawang briefing area ng mga mediamen na nagko-cover sa PNP.

Malapit rin ang naturang tang­gapan sa headquarters ng Base Police ng Camp Crame na kabilang sa mga nangangalaga ng seguridad sa punong him­pilan ng PNP.

Ang insidente ng naturang nakawan sa loob ng Camp Crame ay hindi unang pag­ka­kataon kung saan madalas na magsamantala dito ang mga bukas kotse gang.

Ilang linggo lamang ang nakalilipas ay isang 10 -anyos na batang lalaki ang nahuling may hawak na mga susi at aktong binubuksan ang behi­kulo ng isa sa mga staff ni PNP-Police Community Relations Group (PNP-PCRG) Director P/Chief Supt. Nicanor Bar­ tolome.

Nabatid na ilang beses na ring nagsamantala ang mga kawatan sa nasabing tang­gapan kung saan ultimong ang mga compact disc memory sa mga computer ay pinag-iinte­resan pang nakawin.

Ilang mga reporter rin ang nawalan ng baril, pera, cell­phone at laptop sa nasabing working area at maging sa parking lot. (Joy Cantos)