MMDA traffic enforcers sa kalsada magpa-Pasko

MANILA, Philippines - Magpa-Pasko sa kalsada ang ilang mga traffic enforcer ng Metropolitan Manila Develop­ment Authority (MMDA) ma­tapos na ilagay sa alerto ang ka­nilang puwersa upang maban­tayan ang daloy ng trapiko ngayong Kapaskuhan.

Sa inilabas na “holiday traffic scheme” ni Chairman Oscar Ino­centes, pinahaba ang oras ng trabaho ng mga enforcers ng hanggang hatinggabi o kung ka­kailanganin ay maaaring umabot ng alas-2 ng madaling araw.

Karaniwang ang dalawang shift ng mga enforcers sa kal­sada ay mula alas-6 am- 2pm at 2pm-10pm ngunit pinalawig ito ngayong panahon ng Ka­pas­kuhan. Inaasahan na magi­ging masikip na rin ang daloy ng tra­piko dahil sa mga magha­habol ng bibili ng panregalo o iyong mga nagki-Christmas rush.

Nakaalerto naman ng 24 na oras ang mga tauhan ng Rescue and Road Emergency Group upang makaresponde agad sa anumang uri ng aksidente o tra­hedya na maaaring maganap habang nagmamadaling maka­punta sa kanilang kaanak o makauwi ang mga motorista.

Sinabi naman ni Traffic Ope­rations Center executive di­rector Angelito Vergel de Dios na nagdagdag pa sila ng 500 enforcers buhat sa dating 2,000 tauhan ngayong Kapasku­han. Kabilang din sa kanilang ba­ban­tayan ang mga inaantok na mga motorista na kanilang pipiliting parahin at patabihin upang ma­iwasan ang mga aksidente. (Danilo Garcia)