Hapones idineport dahil sa illegal recruitment

MANILA, Philippines - Ipinatapon ng Bureau of Immigration ang isang Hapones pabalik sa sarili niyang bansa maka­ raang naaresto ito may anim na taon na ang na­kalilipas dahil sa illegal recruitment ng mga mang­ga­gawang Pilipino.  

Sa kanyang ulat kay BI Commissioner Nonoy Libanan, kinilala ni BI deportation unit head Atty. Antonio Rivera ang suspek na si Hiroaki Ogino na idineport no­ong nakaraang linggo sakay ng Philippine Airlines flight patungong Narita, Tokyo, Japan.  

Batay sa record, na­aresto ng BI si Ogino sa Davao City noong Nov. 27, 2003 matapos irek­lamo ng ilan sa kanyang mga nabiktima na na­loko sila ng Hapon at mga kasabwat nito ng pera kapalit ng tourist at working visas sa Japan.  

Ayon sa complainants, tiniyak ni Ogino at mga kasabwat nito na mayroon silang malakas na koneksiyon sa Japanese embassy sa May­nila kaya magiging ma­dali ang pagproseso sa kanilang visa. 

Tumanggap umano si Ogino at iba pang sus­pek mula sa mga bik­tima ng P150,000 hang­gang P350,000 bawat isa ngunit hindi naibigay sa kanila ang ipina­ngakong visa. (Butch Quejada)