Suspek sa child abuse binugbog, patay

MANILA, Philippines - Isang 45 anyos na tricycle driver na inaresto dahil sa pananakit sa isang walong-taong gulang na batang lalake ang nasawi makaraang bugbugin umano ng dalawang barangay tanod na umaresto sa kanya sa Quezon City kamakailan.

Kinilala ang biktima na si Joebert Estellore, may-asawa ng # Area 6, Sitio Cabuyao, Barangay Sauyo, Novaliches, Quezon City.

Ayon sa ulat, si Estellore ay nasawi nang dalhin ng mga operatiba ng Quezon city Police District-Station 4 sa Nova District hospital dahil sa naranasang pananakit ng dibdib at pagkahilo.

Bago nito, si Estellore ay inireklamo ng kasong pag­labag sa Republic Act 7610 o child abuse na isinampa ng isang walong-taong gulang na special child na itinago sa pangalang Bitoy noong Sabado. Dahil sa reklamo, di­nam­pot si Estellore ng mga barangay tanod at dinala sa pre­sinto. Sinasabing dinala muna umano ang biktima sa Que­zon City General hospital para ipasuri ang kalusugan nito.

Nang bisitahin si Estellore ng kanyang kapatid na si Josephine Chavez, at anak na si Joy sa presinto kinala­unan, inireklamo niya ang pananakit ng kanyang dibdib at pagkahilo. Sinabi ng dalawang babae sa mga pulis ang problema kaya isinugod sa ospital si Estellore ban­dang alas-5:37 ng Linggo ng umaga kung saan ito idi­neklarang patay.

Sa pagsisiyasat, lumilitaw na nagtamo ng injury sa batok at mga abrassions sa kaliwang dibdib ang biktima na siyang ikinamatay nito. (Ricky Tulipat)