2 patay sa 'special agent' ng NBI

MANILA, Philippines - Dalawang lalaki ang nasawi makaraang pag­ba­­barilin sila ng kapit­bahay nilang nagpapa­kila­lang “special agent” ng Na­tional Bureau of Investi­gation (NBI) dahil sa tuksuhan, kamaka­lawa ng gabi sa Muntin­lupa City.

Patay na nang idating sa pagamutan sina Noli Dimaapi, ng Block 9 Lot 11 Katarungan Village 2, Brgy. Poblacion at Ed­mundo Ullega, residente rin ng naturang lugar. Nabatid na natadtad ng bala ang ka­tawan ni Di­maapi habang nagtamo ng tama ng bala sa mukha si Ullega.

Tumakas naman ang suspect na nakilala la­mang sa pangalang Saul Her­mano, kapitbahay ng mga biktima at umano’y special agent ng NBI matapos ang ginawang pamamaril.

Sa imbestigasyon ng Muntinlupa police, papa­uwi na ng kanyang bahay ang suspek pasado alas-9 ng gabi nang mapa­daan sa dalawang bik­tima na nag-iinuman. Nagparinig umano ang mga ito na pa­parating na ang miyembro ng “Ta­kuza” (takot sa asawa) habang may nag­salita pa na “ander de saya” ito.

Dito nagpanting ang tenga ng suspek na agad na bumunot ng dala niyang baril at binistay ng bala ang mga kapitbahay na nag-iinuman.

Nabatid na pinag-initan ng mga kapitbahay ang suspek nang manita ito sa ingay ng pag-iinuman sa kalsada at minsa’y pag­papaputok ng baril ng mga kapit­bahay sanhi upang mag­pakilala itong ahente umano ng NBI. (Danilo Garcia)