DILG consultant natagpuang patay

MANILA, Philippines - Isang consultant sa Department of Interior and Local Government (DILG) at dating UP pro­fessor ang natagpu­ang patay sa loob ng ladies comfort room ng nasa­bing kagawaran sa lung­sod Quezon kahapon ng umaga.

Kinilala ang nasawi na si Simeon Obida, 83, residente ng Tayabas Quezon at stay in con­sultant ni Senior Action officer for  Transparency and Anti-Graft-Cor­ruption Asst. Sec. Edgardo Abenina. 

Ayon sa pulisya, si Obida ay natagpuang walang buhay ng ja­ni­tress ng kagawaran na si Candeleria Dornedo, 42, sa loob ng CR na mata­tagpuan sa ika-4 na pa­lapag ng DILG office sa Francisco Gold Con­do­minium II, EDSA corner Mapagmahal St., Brgy. Pinayahan pasado alas-7 ng umaga.

Ayon kay Dornedo, maglilinis sana siya ng banyo sa nasabing pala­pag nang marinig niya ang lagaslas ng tubig mula sa nasabing ku­beta. Dahil dito nag­pasya siyang silipin kung may naliligo, hanggang sa mabungaran niya ang biktima na duguang na­kahandusay sa sahig. 

“Lumabas ’yung dugo niya sa ilong, bunganga at tainga dahil sa lakas marahil ng pressure nito, pero maaring natural death ang pagkamatay,” ayon sa pulisya. 

Batay sa pagsisiyasat ng Scene of the Crime Operatives (SOCO) may nakitang malaking putok sa ulo ang biktima na pi­naniniwalaang nabagok umano matapos na ata­ke­hin sa kanyang sakit.

Gayunman, inaalam pa rin ng pulisya kung may foul play sa pag­ka­matay ng nasabing biktima.