Delivery boy niratrat, patay

MANILA, Philippines - Nasawi ang isang 24- anyos na delivery boy, samantalang sugatan ang isa pang kasama nito matapos silang pagbaba­rilin ng hindi nakikilalang mga suspek habang papasok sa kanilang pinapasukang trabaho kahapon ng madaling-araw sa Sampaloc, Maynila.

Hndi na umabot ng buhay sa Ospital ng Sampaloc sanhi ng tama ng bala sa ulo ang biktimang si Glen Palada ng Zone 7 Wawa Malabon, Biñan Laguna, samantalang ginaga­mot din sa naturang ospital si Vender Perol, 24, binata, store helper ng #84 Geronimo St., Sam­paloc, Manila bunsod ng tama ng bala sa katawan.

Patuloy namang pinaghaha­nap ng pulisya ang mga suspek na nakilala lamang sa mga alyas na   Patotot, Wewe at Mar­vin na mabilis na tumakas ma­tapos ang pamamaril.

Base sa ulat ni Det. Ed­gardo Ko ng Manila Police Dis­trict (MPD)-Homicide Section, dakong alas-12:45 ng madaling araw nang naganap ang insi­dente sa panulukan ng M.H. dela Fuente at F. Fajardo Sts., Sampaloc, Manila.

Nabatid na ang mga biktima ay kapwa delivery boy ng mga softdrinks sa Royal Mart Mer­chandising sa Vicente G. Cruz, Sampaloc, Manila.

Bago naganap ang pama­maril, galing umano ang dalawa sa bahay ni Perol upang ku­muha ng kanilang mga gamit at kumain ng kanilang hapunan.

Matapos kumain ay nag­lakad pabalik sa kanilang pina­pasukan ang dalawa subalit pagdating sa nasabing lugar ay bigla na lamang lumabas sa isang madilim na bahagi ang mga salarin at walang sabi-sabing binaril ang mga ito.

Inaalam pa ng pulisya kung may kaugnayan sa kanilang tra­baho ang motibo sa pagpatay o simpleng nakursunadahan lamang ang mga ito. (Gemma Amargo-Garcia)