Tone-toneladang 'botcha', nasamsam

MANILA, Philippines - Sa kabila ng makailang ulit na pagsalakay ng awtoridad sa Balintawak market dahil sa pagbe­benta ng hot meat, tila wala talagang takot ang mga negosyante na nagbebenta nito makaraang muling makasamsam ang mga awtoridad ng tone-tonela­dang botcha kahapon ng madaling-araw.

Ayon kay Dr. Eduardo Ob­lina, ng National Meat Ins­pection Services (NMIS), sinisimulan muli ng mga negosyante ang ganitong ka­lakalan sa pag-aaka­lang makakalusot sa ma­higpit nilang operasyon.

Isinagawa ang operas­yon sa pangunguna ng La Loma Police Station 1, Task Force Bantay Karne (TFBK) at NMIS, makara­ang makatanggap ng im­pormasyon ang kagawaran na nagkalat na naman ang nagbebenta ng botcha sa nasabing palengke.

Sa sorpresang pagsa­lakay ay naaktuhan sa ilang mga tindahan sa labas ng nasabing pa­lengke ang mga double dead na karne. Wala na rin ang mga nagtitinda ng mga nasabing karne nang sa­la­kayin ito ng mga awtoridad.

Ayon sa NMIS, posib­leng ang mga karne ay mga namatay mula sa naka­raang insidente ng bagyong Ondoy o Pepeng at dinala sa nasabing pa­lengke para ibenta.

Sinasabing madalas na kagatin ng mga mamimili ang ganitong uri ng karne dahil mura ang iniaalok na presyo nito kaysa sa lehiti­mong karne na galing sa inspections. (Ricky Tulipat)