Nagpaanak na doktor ipatatawag ng NBI: Gasa naiwan sa loob ng ari ng ginang

MANILA, Philippines - Ipatatawag ng Na­tional Bureau of Investi­gation (NBI) ang doktor ng Phi­lippine General Hospital (PGH) na inirek­lamo ma­tapos makaiwan ito ng gasa (surgical gauze) sa loob ng ari ng isang pas­yen­teng nag­silang ng sanggol.

Nabatid na isu-sub­poena ng NBI-Vio lence Against Women and Child­­ren Division (VAWCD) si Dr. Maricel Reyes, ang obstetrician/gynecologist (Ob-Gyne), kaugnay sa sinasabing kapabayaan nito sa pas­yenteng si Janet Dizon.

Nabatid na isang bu­wan pa ang nakalipas nang madiskubre na may gasang naiwan sa ari ng ginang nang lagnatin at ma­karamdam ng matin­ding pananakit ng tiyan at puwerta si Dizon.

Sa rekord, noong Hun­­yo 20, 2009 nanga­nak si Dizon sa PGH at na-con­fine sa loob ng 15-araw, dahil sa mataga­lang obser­basyon sa kanya, na may sakit din sa puso at kon­dis­yon ng kanyang isinilang.

Noong Hulyo 5 uma­no siya na-discharge at kina­gabihan ay nilalagnat na umano siya sa bahay na hindi umano niya ininda. Nang manakit umano ang puwerta, inisip lamang niya na dahil iyon sa tahi sa pag­­daan ng sanggol sa puwerta.

Noong Hulyo 21, na­pansin niya na parang may nasa loob ng kan­yang ari kaya ipinasuri niya ito sa Jose Reyes Memorial Me­dical Center kinabukasan at doon nga natuklasan ni Dr. Nerissa Gabriel, Ob-Gyne ang nabubulok na gasa sa loob ng kanyang ari.

Kung hindi umano na­tanggal ay posibleng mas lumala ang impeksiyon na maari niyang ika­matay.

Aalamin sa imbesti­gas­yon ang panana­gutan ni Dr. Reyes sa kapabayaan.