6 pulis sugatan sa drill

MANILA, Philippines - Nagdulot ng tensiyon sa Manila Police District (MPD) head­quarters ang hostage-taking drill kahapon ng hapon, nang maging makatotohanan ang pagsabog ng ibinatong flash bomb sa gumanap na hostage-takers, kung saan anim na pulis ang sugatan habang nawasak naman ang halos lahat ng mga bintana ng training room sa U.N, Avenue, Ermita, Maynila.

Ito’y dahil sa gina­nap na Annual General Inspection/Operation Readiness Security Inspection Test and Evaluation ng mga opisyal ng PNP sa Camp Crame sa mga kagawad ng MPD, sa loob ng Manila Police Aca­demy (MPA) building, sa loob ng headquarters. Tumanggi namang pangalanan ang mga sugatang biktima, na pawang minor lamang ang injuries.

Nilinaw naman ni MPD-director Rodolfo Magtibay na improvised bomb lamang ang ginamit sa drill at naging malakas lamang ang impact dahil pawang nakasarado ang salaming bintana ng nagsilbing training room o ang bahagi ng aplayan ng police clearance. (Ludy Bermudo)