2 holdaper, 1 tanod dedo sa barilan

MANILA, Philippines - Dalawang holdaper at isang barangay tanod ang napatay matapos ang madugong eng­kwen­tro ng mga suspek at ng pulisya ilang minuto makaraang maholdap ang isang Bombay sa Barangay Tandang Sora, Quezon City kamaka­lawa ng hapon.

Isa sa mga napatay na suspek ang kinilala ng pulisya na si Efren Ponce, 38, ng Laporteza Subdivision, Camarin Caloocan City. Ang kan­yang kasa­mahan ay may ta­ttoo ng “Guardians, GPI, Eric” sa ka­nang balikat.

Ang nasawing baran­gay tanod ay nakilalang si Milogen Manginsay, 40, ng Alcantara St., Ban­lat Road, Tandang Sora.

Sugatan din ang mga biktimang sina Nathaniel Sevilla, 44; at Diosdado Baquiran, 38, kapwa mga residente sa nasabing barangay.

Nauna rito, nakipag­ba­rilan ang mga suspek sa mga nagrespondeng pu­lisya at mga barangay tanod na naalarma sa panghoholdap sa isang Bombay na nakilala lang sa pangalang Omar. (Ricky Tulipat)