Pagrepaso sa dengue cases hiling

MANILA, Philippines - Hiniling kamakailan ng Quezon City Health Department sa mga pam­­­publiko at pribadong ospital na repasuhin ang sistema ng paghawak nila sa mga kaso ng mga pasyenteng nagkasakit ng dengue para maiwa­san ang pagdami ng mga taong namamatay dito.

Sinabi ni City Health Department Head Dr. An­tonieta Inumerable na da­pat matukoy kung ano ang kakulangan ng mga os­pital na nagiging sanhi ng pagtaas ng bilang ng mga namamatay sa dengue.

Batay sa naitala, 57 ang kaso ng namatay sa dengue mula Enero hang­­gang Agosto 31 ng taong kasalukuyan na mas ma­taas sa 31 kasong naitala noong nakaraang taon.

Sinabi ni Inumerable na lubhang nakaka­alarma ang pagtaas ng bilang ng namamatay sa dengue lalo pa at may mga rek­lamo ang pa­milya ng ilan sa nasawi na may pag­kukulang umano sa pangyayari ang ospital o tauhan nito.

May mga reklamo, ayon kay Inumerable, ma­tapos suriin at bigyan ng gamot na paracetamol ang pasyenteng may lagnat, pinapauwi na ito.

Matapos ang isa o dalawang araw, nagu­gulat na lang ang pamilya ng pasyente dahil nag­karoon ito ng dengue hemorrhagic fever na ikinamatay nito.