13-anyos todas sa pamamalo ng ina

MANILA, Philippines - Isang 13-anyos na batang lalake ang nasawi makaraang paghahata­win ng kahoy sa ulo at katawan ng sariling ina na nagalit matapos na umano’y putulin ng una ang kanilang kawad ng kuryente para gawing tanso at ibenta sa lung­sod Quezon, iniulat ka­hapon.

Dead-on-arrival sa East Avenue Medical Center (EAMC) ang bikti­mang si Ronald Gonza­les, 13, 1st year high school, ng Kampupot St., Purok 17, Unit 5, Brgy. Commonwealth ng na­sabing lungsod.

Samantala, nakapiit naman sa tanggapan ng Quezon City Police Dis­trict-Criminal Invistigation & Detection Unit (QCPD-CIDU) ang suspek na si Salve Torno-Gonzales, 38, habang inihahanda ang kasong parricide laban dito.

Sa imbestigasyon ng pulisya, nangyari ang in­si­dente sa may loob mis­mo ng bahay ng pamilya Gonzales pasado alas-9 ng gabi.

Lasing umano nang umuwi sa kanilang bahay ang inang si Salve at naabutan nitong walang ilaw sa kanilang bahay. Nang tignan ni Salve ay nalaman nitong pinaki­alaman umano ng bina­tilyo ang kable ng ka­nilang kuryente na na­ging sanhi ng naturang pagdilim sa kanilang ka­ba­hayan, maging sa ka­nilang kapitbahay.

Sa galit kinuha ni Salve ang kanilang walis tambo saka pinuntahan ang natutulog nitong anak sa kuwarto saka wa­­lang humpay na pi­nag­papalo sa ulo at ka­tawan. Natigilan lang umano ang suspek sa kan­yang pambubugbog sa anak nang mamagitan na ang ilan nilang kapit­bahay.

Kahapon pasado alas-6 ng umaga nang mapuna nina Rhey at Racel ang kapatid na si Ronald na walang malay kung kaya agad nilang ipinagbigay alam ito sa tiya­hin at isinugod sa na­sabing pagamutan kung saan ito idineklarang pa­ tay ni Dr. Jomar Malana.

Dahil dito kung kaya’t nagpasya ang mga ka­anak ng mga biktima na ipaaresto sa pulisya ang ginang na nagsabing “Nagdilim ang paningin ko, hindi ko alam na ganun ang mangyayari,” bagay na hindi sinasang-ayunan ng awtoridad.

Sinasabing naga­wang putulin ng binatilyo ang kawad ng kanilang kuryente para gawing tanso at maibenta nang magkapera ito.